ဒီရောဂါဟာ ဂျပန်ဦးနှောက်ရောင်ဗိုင်းရပ်စ် (Japanese Encephalitis V) ကူးစက်ခံရတဲ့အခါမျိုးမှာ ဖြစ်တတ်တဲ့ရောဂါ ဖြစ်ပါတယ်။ ခြင်ကနေကူးစက်ပြီး ဆင်ခြေထောက်ရောဂါဖြစ်စေတဲ့ ကျူးလက်စ် လို့ခေါ်တဲ့ ခြင်အမျိုးအစား အကိုက်ခံရရင် ဖြစ်နိုင်ပါတယ်။ သွေးလွန်တုပ်ကွေးကို ဖြစ်စေတဲ့ အေးဒီးစ်ခြင်က ရေကြည် ရေသန့်မှာ ပေါက်ပေမယ့် ဒီခြင်ကတော့ မြောင်းပုပ်၊ ဗွက်အိုင်၊ ရေဆိုးတွေမှာ ပေါက်ဖွားပါတယ်။

WHO ရဲ့ ထုတ်ပြန်ချက်တွေအရ အာရှနိုင်ငံတွေမှာ ဖြစ်တဲ့ ဦးနှောက်ရောင်ရောဂါတွေရဲ့ အဖြစ်အများ ဆုံး အကြောင်းရင်းလို့ သိရပါတယ်။ ဘယ်လိုအရွယ်မဆို ဖြစ်နိုင်သလို၊ ကလေးတွေမှာဆိုရင် ၀မ်းပျက် ၀မ်းလျှော၊ အဆုတ်ရောင်ရောဂါတွေလောက် ဖြစ်နှုန်းမများပေမယ့် သေဆုံးမှုနှုန်းက ၃၀ ရာခိုင်နှုန်း ရှိပါတယ်။ မသေဆုံးခဲ့ရင်တောင် အာရုံကြောပိုင်းဆိုင်ရာ ပြဿနာတွေနဲ့ကျန်ခဲ့တာ၊ ဆွံ့အနားမကြား ဖြစ်သွားတာ၊ တစ်သက်လုံး ပုံမှန်ပြန်မဖြစ်တော့တာက ၃၀ ကနေ ၅၀ ရာခိုင်နှုန်းလောက် ရှိတယ်လို့ ဆိုပါတယ်။ တစ်နှစ် အောက်ကလေးတွေမှာ စတုတ္ထမြောက် အသေအပျောက်အများဆုံး ရောဂါဖြစ်ပြီး၊ အသက်တစ်နှစ်ကနေ ငါးနှစ်အထိ ကလေးတွေမှာတော့ တတိယမြောက် အသေအပျောက်အများဆုံး ရောဂါလို့ သိရပါတယ်။ နောက်တစ်ခုက ဒီရောဂါကို အရှင်းပျောက်ကင်းအောင် ကုလို့မရသေးပါဘူး။ အဓိကက ရောဂါတွေ လက္ခဏာ တွေ ဆိုးရွားမလာအောင်၊ လူနာက ဒီဗိုင်းရပ်စ်ပိုးကူးစက်ခံရမှုကို တွန်းလှန်နိုင်အောင်သာ လုပ်ပေးနိုင်ပါတယ်။

ရောဂါလက္ခဏာအနေနဲ့တော့ ကလေးက အဲဒီလို ဂျပန်ဦးနှောက်ရောင်ရောဂါ ဖြစ်နိုင်တဲ့ နေရာဒေသ မျိုးမှာ ခြင်ကိုက်ခံရတဲ့ ထိတွေ့မှုရှိမယ်။ ဖျားမယ်၊ ပျို့အန်မယ်၊ ခေါင်းကိုက်မယ်၊ တက်မယ်၊ သတိလစ်မယ်၊ အသက်ရှူတွေ မြန်လာမယ်။ ဒါတွေဖြစ်လာတာနဲ့ ဂျပန်ဦးနှောင်ရောင် ဖြစ်နေပြီလို့ ယတိပြတ်ပြောလို့တော့ မရပေမယ့် ဒါလေးကို ပြေးသတိရစေချင်ပါတယ်။ ဒါဆို အမြန်ဆုံးဆေးရုံသွားပြီး လိုအပ်တဲ့ စစ်ဆေးမှုနဲ့ ကုသမှုတွေ ခံယူနိုင်မှာလည်း ဖြစ်ပါတယ်။

ဒီလိုတွေ သေဆုံးမှုနှုန်းနဲ့ ရာသက်ပန် မသန်စွမ်းဖြစ်ကျန်ခဲ့တဲ့နှုန်းတွေ များပေမယ့် ၀မ်းသာစရာ ကတော့ ထိရောက်ပြီး ဘေးကင်းတဲ့ ကာကွယ်ဆေးတွေ ပေါ်နေပြီဆိုတာပါပဲ။ နှစ်ကြိမ်ထိုးထားနိုင်ရင် အကောင်းဆုံးဖြစ်ပြီး၊ တစ်ကြိမ်နဲ့တစ်ကြိမ် ၂၈ ရက်ခြားပြီး ထိုးရပါတယ်။ မလိုလားအပ်တဲ့ ဆိုးကျိုးက မရှိသလောက်ကို ရှားပါတယ်။ မိဘတွေက ကာကွယ်ဆေးလို့ပြောလိုက်ရင် ကလေးကိုထိခိုက်မှာ တအား ကြောက်တတ်ကြလို့ ရှင်းပြတာပါ။ ဆေးထိုးတဲ့ နေရာမှာ နာတာ၊ ဖျားတာမျိုး ရှိနိုင်တယ်။ ဘယ်သူမှ ကြိုမသိ နိုင်တဲ့ ဆေးနဲ့ဓါတ်မတည့်ဘူးဆိုတာမျိုးကလည်း ဖြစ်နှုန်းတအားကိုနည်းပါတယ်။

ပြင်ပဆေးခန်းတွေမှာလည်း ထိုးပေးနိုင်ပြီး၊ ခုဆိုရင် ဂျပန်ဦးနှောက်ရောင်ရောဂါ ကာကွယ်ဆေးကို လာမယ့် ၂၀၁၇ နိုဝင်ဘာလ ၁၅ ရက်နေ့ကနေ ၂၃ ရက်နေ့အထိ ကျောင်းအခြေပြု ကာကွယ်ဆေးထိုး အစီအစဉ်အနေနဲ့ ထိုးပေးတော့မှာဖြစ်ပါတယ်။ ဒီဇင်ဘာလ ၁၁ ရက်နေ့ကနေ ၂၀ ရက်နေ့ အထိကိုတော့ ပြည်သူလူထုအခြေပြု ကာကွယ်ဆေးထိုးအစီအစဉ်အဖြစ် ရပ်ကွက်ထဲမှာ စုရပ်တွေထားပြီး အသက် ၉ လကနေ ၅ နှစ်အထိ ကလေးတွေ၊ ၁၅ နှစ်အထိ ကျောင်းမနေရတဲ့ကလေးတွေ၊ ကျောင်းအခြေပြု ကာကွယ် ဆေးထိုးအစီအစဉ်မှာ အကြောင်းကြောင်းကြောင့် ဆေးမထိုးလိုက်ရတဲ့ ကလေးတွေကို အခမဲ့ ထိုးနှံပေးသွားမှာ ဖြစ်တယ်လို့လည်း သိရပါတယ်။

၂၀၁၈ ခုနှစ်၊ ဇန်န၀ါရီလကစပြီး အမျိုးသား ကာကွယ်ဆေးထိုး အစီအစဉ်မှာ အသက် ၉ လအရွယ် ကလေးတွေအတွက် ထိုးပေးရမယ့် ကာကွယ်ဆေးအဖြစ် ပုံမှန်ထည့်သွင်းသွားတော့မှာလည်း ဖြစ်ပါတယ်။ အသက် ၉ လကနေ ၁၅ နှစ်အတွင်း ကလေးတွေကို ထိုးပေးမှာကတော့ ဒီတစ်ကြိမ်ပဲဖြစ်တာမို့ မပျက်မကွက် ထိုးပေးကြဖို့ တိုက်တွန်းလိုပါတယ်။

ရောဂါရှာဖွေရလည်း ခက်ခဲသလို၊ ကုသရလည်း ခက်တာမို့ ကာကွယ်ဆေးထိုးထားခြင်းဖြင့် ကိုယ့် ကလေးကို ဒီရောဂါကနေ အကောင်းဆုံး ကာကွယ်နိုင်မှာ ဖြစ်ပါတယ်။